როგორ ავიცილოთ მუხლის დაზიანება - ველობლოგი

ველომოყვარულების დიდ ნაწილს წარმოდგენა არა აქვს რა მძიმე შედეგებით შეიძლება დასრულდეს მუხლებისთვის არასწორი დატვირთვა ველოსიპედით მოძრაობისას. საფრთხე სერიოზულია ნებისმიერი ასაკისთვის, თუმცა მისი თავიდან აცილება ადვილადაა შესაძლებელი რამდენიმე რჩევის გათვალისწინების შედეგად. 

ველოსიპედით კატაობისას უმეტესობას ეშინია გადმოვარდნის და დამტვრევის. თუმცა, არსებობს სხეულის ნაწილები, რომლებიც შეიძლება გამოუსწორებლად დავიზიანოთ დამტვრევის გარეშეც, პედლების არასწორად ტრიალის შედეგად. ალბათ არაერთ ველომოყვარულს გქონიათ შემთხვევა - ველოსიპედით უპრობლემოდ გაგივლიათ 20-30 კილომეტრი და მერე დაგწყებიათ მუხლების ტკივილი... გაივლი ფეხით? - ყველაფერი კარგადაა. დაჯდები ველოსიპედზე და ისევ იწყება მუხლების ტკივილი. ჯერ მარჯვენა, მერე ორივე… ეს უკვე იმის ნიშანია, რომ სერიოზული პრობლემები გექნებათ მალე, თუ არ გაითვალისწინებთ შემდეგ რჩევებს: 

• სწორი კადენსი.კადენსი - ველოსიპედის პედლების ბრუნთა რაოდენობაა წუთში. ახალბედების დიდი ნაწილი პედლებს ატრიალებს ძალიან ნელა და დიდი ძალისხმევის შედეგად. ადამიანის ანატომიის თვალსაზრისით, ველოსიპედით მოძრაობა ძალიან არადამახასიათებელი დატვირთვაა სხეულისთვის. ამის გამო, ველომოყვარულების უმეტესობას მუხლების პრობლემა უდგება არასწორი და ხანგრძლივი კატაობის შედეგად. თანამედროვე ველოსიპედს ტრანსმისია - სიჩქარეები შემთხვევით არ უყენია. პედლების ბრუნთა ოპტიმალური რიცხვი ანუ კადენსი ნებისმიერ შემთხვევაში უნდა იყოს დაახლოებით 90 ბრუნი წუთში პედლებზე ძალის დატანების გარეშე. რომ მიიღოთ სწორი კადენსი, აიღეთ წამზომი და 10 წამის განმავლობაში დაითვალეთ რამდენ ბრუნს აკეთეთებთ. საუკეთესო შემთხვევაში, ეს უნდა იყოს 15 ბრუნი ამ 10 წამის განმავლობაში. უფრო გარკვევით რომ ავხსნათ, პედლების ტრიალის ეს ტემპი უნდა გეჭიროთ მოძრაობისას ფეხებზე ძალის დაუტანებლად. ამისთვის საჭირო იქნება სიჩქარეების გადართვა იმ ოპტიმალურზე, რომლის დროსაც თქვენ, ფეხებზე ძალის დატანების გარეშე შეძლებთ წუთში 90 ბრუნის გაკეთებს პედლების ტრიალისას. 
• მეორე მნიშვნელოვანი საკითხია მანძილის და ხანგრძლივობის სწორად შერჩევა:
  ახალბედების ნაწილი, ველოსიპედის ყიდვისთანავე გადიან შორ მანძილებზე; ან გამოცდილები საკუთარი შესაძლებლობების გამოსაცდელად, წინასწარი მომზადების გარეშე გადიან დიდ მანძილებს. ესეც არანაკლებ ზიანის მომტანია. დაიწყეთ მცირე მანძილებით და ნელნელა გაზარდეთ დატვირთვა. მაგალითად: თუ დღეში 10 კილომეტრს გადიხართ დაღლის და პრობლემების გარეშე, ეს არ ნიშნავს, რომ უცებ შეგიძლიათ 100 კილომეტრის გავლა. დისტანცია უნდა გაზარდოთ ნელნელა. 100 კილომეტრის გავლა მოსინჯეთ მაშინ, როცა დღეში 50-60 კილომეტრი ჩვეულებრივი მანძილი იქნება თქვენთვის. გახსოვდეთ, რომ იმწამიერი სიამოვნება, ან რისკი ნამდვილად არ ღირს მომავალში დანგრეულ ცხოვრებად. საფრთხე რეალურია და ძალიან სერიოზული. 
• კადენსის და დისტანციის გარდა, არანაკლებ მნიშვნელოვანია ორგანიზმის სითხით მომარაგება:
  ჩვენს სახსრებს სჭირდება სპეციალური საპოხი საშუალება ისევე, როგორც მექანიზმების მოძრავ ნაწილებს სჭირდებათ დაზეთვა. ფიზიკური დატვირთვის დროს ადამიანი ოფლიანდება - ორგანიზმიდან გამოდის სითხე. ამ დროს მცირდება სახსრების საპოხი სითხის გამომუშავებაც. გაუწყლოვნების შემთხვევაში შესაძლებელია ერთ გასეირნებაზეც კი სერიოზულად დაიზიანოთ მუხლები. ცხელ დღეებში ოფლიანობა უფრო ინტენსიურია. ესეიგი ორგანიზმი უფრო მეტ სითხეს კარგავს. ასეთ დროს ჩვეულებრივი სასმელი წყალი არ კმარა. აუცილებელია იზოტონიური სასმელების მიღება. ეს სასმელები ორგანიზმს აწვდიან წყალს, ნახშირწყლებს და ელექტროლიტებს, რომლებისგანაც სწრაფად იცლება ადამიანი ოფლიანობის დროს. იზოტონიური სასმელის მომზადება სახლის პირობებშიცაა შესაძლებელი. ამისათვის საჭიროა ერთმანეთში შევურიოთ ნახევარი ლიტრი ნატურალური ხილის წვენი, ნახევარი ლიტრი წყალი და ერთი სუფრის კოვზი მარილი. თუ არაა საშუალება, ან მარაგი გაგითავდათ გზაში, მინერალური წყალი შეგიძლიათ მიირთვათ. ოღონდ აუცილებელია მიირთვათ მცირე დოზებით წყურვილის გრძნობის გაჩენამდე, რეგულაურად ყოველ 15-20 წუთში ერთხელ.
• კიდევ ერთი მთავარი საკითხი - სითბოა:
  ცივ ამინდებში სახსრებიც ცუდად იპოხება. არ დაუშვათ სახსრების გაციება. თუ ტემპერატურა გარეთ 15 გრადუსზე ნაკლებია, შორტებით არ ღირს გასვლა. აუცილებლად ჩაიცვით შარვალი. თუ ქარია, ქარგაუმტარი მასალით შეკერილი შარვალი გამოიყენეთ. 
• ველოსიპედით სადმე გასვლამდე აუცილებლად გააკეთეთ მსუბუქი, ზოგადი სახის ვარჯიშები. ასევე არაა აუცილებელი მოძრაობის დაწყებისთანავე დიდ დატვირთვებზე გახვიდეთ. ეცადეთ პირველი 10 წუთი მსუბუქად იმოძრავოთ. 

რომ შევაჯამოთ:

• არ უნდა დაატანოთ ძალა ფეხებს პედლების ტრიალისას;
• მიაწოდეთ ორგანიზმს საკმარისი სითხე;
• დაიცავით გაციებისგან სახსრები;
• და ნუ გახვალთ შორ მანძილებზე სათანადო წინასწარი მომზადების გარეშე.

იკატავეთ და იმოძრავეთ სიამოვნებისთვის. თუ სპორტული ჟინი გაქვთ, მაშინ აუცილებლად გაწევრიანდით სპორტულ ველოკლუბში და გამოცდილი მწვრთნელების მეთვალყურეობის ქვეშ გაიუმჯობესეთ თქვენი შედეგები. თვითნებურად ორგანიზმის არასწორმა დატვირთვამ შეიძლება მიგიყვანოთ დასახიჩრებამდე ან სიკვდილამდეც კი.